අම්මේ අම්මේ මගේ කොණ්ඩේ,,

අද මට ඔහොම ඉන්න ගමන් මතක් උනා මීට අවුරුද්දකට විතර කලින් මට වෙච්චි ඇබැද්දියක් ගැන.. මට ඉතින් උනොත් වෙන්නේ ඔය වගේ වැඩ තමයි නේ.. මේකත් අර කචල් හීනයක් තමයි.. කචල් උනත් මොකද හීනයක් නම්.. ඒත් මේක නම් හීනයක් නෙමේ.. හැබෑවට වෙච්චි සිදුවීමක්..

එදත් වෙනදා වගේම අලුත් ඒත් එපා කරපු දවසක ආරම්භයක්.. එපා කරපු දවසක් කිව්වේ ඉතින් ඉස්කෝලේ යන්න වේලාස්සන නැගිටින්න ඕනේ හින්දා..අනික ඒ සීත කාලේ මෙහෙට..පාන්දර හයට නැගිටින වෙලාවට තමා හොදම නින්ද..ඒ උනාට කොහෙද ඉතින් හයේ ඉදන් නැගිටගෙන වද දෙන්න එපැයි..මෙහෙ සීත කාලේ කියන්නේ ඉතින් ලංකාවේ පාන්දර වැටෙන හීන් ඉර එලිය ගැන හිතලාවත් නෑ.. හද්ද කරුවලයි..

පාන්දර හයේ සීනුව වැදෙනකොටම මමත් වෙනදා පුරුද්දටම නැගිටල අත පත ගාගෙන හෙව්වේ ලයිට් එක දාන ස්විච් එක..ලයිට් එක දානවා දානවා ලයිට් එක වැටෙන්නේ නෑ... මාත් ඉතින් හොල්මන වගේ කාමරෙන් එලියට බැස්සේ කොරිඩෝවේ ලයිට් එකවත් වැඩ කරනවද බලන්න..ම්හ්ම්.. ඒකත් වැඩ නෑ.. මටත් පුදුමයි ඉතින් මොකද මෙහෙ කරන්ට් එක යනවා කියන්නේ කලාතුරකින්..ඊලඟට බිත්තිය අත ගාගෙන අම්මලාගේ කාමරේ දිහාවට ගිහින් මම තාත්තාට කිව්වා.. තාත්තේ ලයිට් නෑ වගේය කියල..තාත්තාත් ඇවිත් බලලා කිව්වේ කරන්ට් එක ගිහින් වගේය කියලා.. දැන් ඉතින් මොනා කරන්නද.. ඉස්කෝලෙ යන්නත් පරක්කු වෙන නිසා අම්මා මගේ අතට ඉටි පන්දමක් දීලා කිව්වා මූණ හෝදගෙන එන්නයි කියලා..මමත් ඉතින් ඉටි පන්දමත් අතින් අරගෙනම නාන කාමරේට ගොඩ උනා.. ඒ ගමන ඉටි පන්දම තියන්න තැනක් නෑ..සින්ක් එක උඩින් තිබ්බාට පේන්නෙත් නෑ.. ඒක හින්දා කණ්ණාඩියට පහලින් විසිතුරු බඩු තියන්න හදලා තිබුන වීදුරු පඩිය උඩින් ඉටි පන්දම තියලා බලද්දි එතන නම් හොදයි වගේ.. ගානට එලිය විහිදෙනවා..ඒක එතනින් තියලා ගොතලා තිබුන කොන්ඩේ උඩට කරලා කට්ටක් ගහගෙන මම පහත් උනේ මූණ හෝද ගන්න.. ටික වෙලාවක් යනකොට මට නිකන් තේරෙනවා එලිය වැඩි වෙන ගතියක් වගේ..කරන්ට් එක ආවාවත්දෝ කියලා ඔලුව උස්සල කණ්නාඩියෙන් බලද්දි මොකද.. බලන්න දෙයක් නෑ උස්සලා ගහ ගත්තු කොන්ඩේ අගිස්ස ගිනි ගන්නවා....අපෝයි මම බය වෙච්චි බය විල්ලක්.. මම දැන් කණ්නාඩියෙන් බලාගෙන බෙරිහන් දෙනවා..අම්මේ අම්මේ මගේ කොණ්ඩේ කියලා.. ගිනි ගන්න අගිස්ස නිමා ගන්නවත් කල්පනාවක් නෑ මට.. අම්මාත් කරුවලේ දඩ බඩ ගාලා දුවන් ඇවිත් මගේ ඔලුව ඇල්ලුවා ටැප් එකට...හප්පේ ගන්දනාවේ බෑ පිච්චුන කොන්ඩේ..වෙලාව කියන්නේ පිච්චිලා තියෙන්නේ කොන්ඩේ අගිස්ස.. මැදින් හෙම පිච්චුනා නම් මම ඉදලා හමාරයි.. කොන්ඩේ පිච්චුනා මදිවට අම්මාගෙනුත් බැනුම් අහපියව්කෝ ඉතින් කරන්නන් වාලේ වැඩ කරනවා කල්පනාවක් නැතුව කියලා..කවුද වගේ උඩ පැන පැන උන්නේ කොන්ඩෙට වතුර අල්ලලා නිමා ගන්නේ නැතුව.. බ්ලා.. බ්ලා.. අම්මා නම් කියයි. මම බය වෙච්ච බය විල්ල මම නේ දන්නේ... ගහෙන් වැටිච්ච මිනිහට ගොනා ඇන්නා වගේ වැඩක් මට වුනේ..