ගල් ගැසුන සිත් අතර.. II

ඇඳට වැටෙනවා විතරයි දන්නේ.. මට ආයෙම හොඳටම නින්ද ගිහින්.. පිටි ගෝනියක් වගේ දෙයක් මගෙ ඇඟට පාත් වෙනවා වගේ දැනෙනවත් එක්කම මාව උඩ ගිහින් ඇහැරුනේ අන්දුන් කුන්දුන් වෙලා... ආයෙ මොනා බලන්නද ඉතින් ඔය වගේ වැඩක් කරොත් ඉතින් අපේ පොඩි අඟ තමයි...

"අපෝ මොකද අක්කෙ ඔය?? ආව වෙලේ ඉදන් මූණ දෙබර කූඩයක් වගේ පුම්බගෙන හූල්ල හූල්ල ඉන්නේ.. එක්කෝ මූණ කචල් නැත්නම් නිදි... අපෝ... "

"මෝඩියේ ඔය බැරල් ඇඟ මගෙන් අහකට ගන්නවා.. නැත්නම් මාව පොඩි වෙයි.. අනික මේ සීතේ වෙන මොනා කරන්නද.. නිදාගන්න තමයි හොඳ.. නිකන්ම නින්ද යනවා.."

" ආ.. ඇත්තද.. නිදාගන්නවද නැත්තන් අරයා ගැන හීන මවනවද.. "

" නංගි මේ.. අම්මට කතා කරන්නද?? "

"අපෝ නෑ නෑ.. මගේ සුදු අක්කි පැටියා.. මම ඉතින් ආදරේටනේ.. උම්මා.. "

"හරි හරි.. මේ බබෝ අපි අම්මිගෙන් අහලා ටිකක් එලියට යමුද?? "

ජැකට් එකයි දනිස් දෙකටම තියෙන බූට්ස් දෙකකුයි දාගෙන මායි නංගියි එලියට බැස්සේ වටපිටාව පොඩ්ඩක් බලාගන්න හිතාගෙන... බලන බලන හැම පැත්තෙම සුදු හිම විතරක්මයි...හුස්මක් ගන්න හැමසැරේකම සුදු පාටට දුම් වලල්ලක් නැගුනේ සීත වැඩිකමට වෙන්න ඕනේ.. අඩියක්වත් ගහලා නැති සුදු හිම තට්ටුවක් උඩ මම මගේ නම ලියන්න පාත් වෙලා ඉන්නකොට මුලු ඇඟම හිරිවැටිලා යන්න තරමේ හිම බෝලයක් මගේ මූණ හරහා වැදුනේ නොහිතපු විදියට.. ඒත් එක්කම හිම ගුලියක් අතට අරගෙන නංගිට ගැහුව පාර නංගිගේ කොන්ඩේ පුරා හිම කැට.. හිම බෝල වලින් ගගහා වැඩි වෙලාවක් ඉන්න හම්බ උනේ නෑ, ටික වෙලාවක් යනකොට කකුල් අත් ගල් වෙලා වගේ කිසිම හැඟීමක් දැනීමක් නැති තරමටම... වැඩි හිනා වෙන්නත් බෑ සීතලට තොල් පැලෙන්න බලනවා...

"ඔහොම හිනා වෙලා ඉන්නවකො අක්කේ.. මෙහෙට පුරුදු වෙනකොට සේරම හරි යයි.."

එහෙම කියලා නංගි මගෙ අතකින් තද කරලා අල්ලගත්තේ මාව සනසන්න වගේ.. හැමෝම මට ආදරෙයි. එක අතකට මේ තරම් දුක් වෙන්න දේකුත් නෑ.. හැමදේම වෙන්නේ හොඳට කියනවානේ..

"හ්ම් හ්ම්.. දැන් යමුද?? පැලෙන්න සීතයි.."

"යමු.. හෙට අපි අම්මිගෙන් අහලා මගේ යාලුවෝ හම්බ වෙන්න යමු හරිද??.. එතකොට අක්කිට ඒ සේරමල්ලවම අඳුරගත්තෑකි.. "

"යමු යමු.. දැන් ඉතින් ඔයා දන්න හැමතැනකම මාව එක්ක යන්න වෙනවා.."

"අයියෝ යන්නම්කො එක්කගෙන.."

මෙහෙ දවස ගෙවෙන්නේ හරිම හිමීට වගේ.. වෙලාව යන්නෙත් නෑ.. ඒත් හවස හතරහමාර පහ පහු වෙනකොට කලුවර වැටෙනවා.. ටීවී එක බලන්න ඉඳගත්තත් ඒකේ කියන එව්වා තේරෙන එකක්යැ.. නිකන් රූප දිහාව බලන් ඉන්න එක තමා.. පලවෙනි දවස ඔහොම හරීම හිමීට ගෙවිලා ගිහින් පහුවෙනිදා උදේන්ම නංගි මාව ඇහැරෙව්වේ එයත් එක්ක යාලුවෝ හම්බවෙන්න යන්න .. මොනා කරලා හරි කමක් නෑ මට ඕනේ උනේ මේ පාලු ගතිය ටිකක් මඟඇරගන්න..යන අතරමඟ ටවුන් එකට යන බස් එක ගන්න හැටි.. බස් ටිකට් එක ගන්න තැන් ඒ දේවල් සේරම මට කියාදෙන්නත් නංගි අමතක කරේ නෑ.. බලන බලන් හැම අතේම ගොඩනැගිලි.. ගස් වල එක කොලයක් නෑ.. බැලූ බල්මට හරිම මූසල පෙනුමක් තියෙන්නේ.. නංගි නම් කියන්නේ ඒ සීත කාලේ හින්දලු.. කතාවෙන් කතාව ටවුන් එකටත් ඇවිත් දෙන්නම බස් එකෙන් බැහැලා පයින් ටික දුරක් අවිදන් ගියේ පාක් එක දිහාවට.. යනකොටත් බංකුවක් උඩට වෙලා ලංකාවේ කියලා හිතන්න පුලුවන් ගෑණු ලමයෙකුයි තව සුදුම සුදු කෙල්ලො කොල්ලො දෙතුන් දෙනෙකුයි බලාගෙන ඉන්නවා...

"ආහ් මේ ඉන්නේ කස්ටිය... සඳු මේ තමයි අපේ අක්කි." කට පුරා හිනා වෙච්ච කෙල්ල නම් හරිම හොඳ පාටයි.. අනිත් අය නම් කටත් ඇරන් බලන් ඉන්නවා අපි සිංහලෙන් කතාකරනකොට.. නංගි නම් මොන මොනාදෝ කිව්වා ඒත් එක්කම කට්ටියම මට අතට අත දීලා මාව අඳුරගත්තා... මම නම් කරේ හිනා වෙන එක විතරමයි.. බැන්නා උනත් තේරෙන එකක් යැ ඉතින්...

ටවුන් එකේ හැම අස්සක මුල්ලකමයි ඇඳුම් කඩයක් ගානෙයි කට්ටිය මාව ඇවිද්දුවේ හරිම උනන්දුවෙන්.. මෙයාලට නම් මේ හරිය හොඳට පුරුදු පාටයි.. කඩයක් ඇතුලට ගිහින් කට්ටිය එලියට බහින්නේ make-up උලාගෙන.. සෙන්ට් ගහගෙන හරියට මෙයාලාගේ වගේ.. මට නම් හිතට බයයි ඔව්වා කරන්න.. ඒත් එකෙත් පොඩි ජොලියක් නොතිබ්බම නෙමේ... අද දවස නම් නංගිගේ යාලුවොත් එක්ක ගෙවුනේ පාලුවක් නැතිව.. පුරුදු වෙනකොට හැමදේම හරි යයි කියලා මටත් දැන් හිතෙනවා.. නංගි ඉන්න එක මගෙ හිතට ලොකු හයියක්...

-----------------------------------------------------------------------------------------------

අද සෙනසුරාදා.. සඳුදාට භාශාව ඉගෙන ගන්න පන්ති යන්න ඕනේ කියලා තාත්ති කිව්වා.. යන්නත් නිකන් මොකක්ද වගේ.. නොයාත් බෑ.. සඳුදා මට කොච්චර එපා කරපු දවසක් වෙයිද දන්නේ නෑ.. උෆ්ෆා...

"නංගි භාශාව උගන්නන්නත් ඉන්නේ මෙහෙ කට්ටියමද?? "

" හ්ම් ඔව් ඉතින්.. "

"ඉතින් මට මෙයාලා කියන කිසිම දෙයක් තේරෙන්නේ නෑනේ බබෝ.. :/ "

"තේරෙයි තේරෙයි.. ඒගොල්ලෝ රඟපාලා උගන්නනවා.. බය වෙන්න එපා අනේ.."

" :/ ඔයා නම් කියයි "

දෙයියනේ මට නම් බයේ බෑ.. දැන් ඉතින් ඉක්මනට සඳුදා වෙයි...